ຂໍ້ມູນຄ່ານໍ້າຂອງລູກຄ້າ
ໂປຼແກຣມ ຂອງ ນໍ້າປະປານະຄອນຫຼວງ
ກ່ຽວກັບ ນປນຄ
ການບໍລິການ
ສູນຝຶກອົບຮົມ
ຕິດຕໍ່ສອບຖາມ
Latest Video
ຮູບພາບການເຄື່ອນໄຫວຕ່າງໆ
ສະຖິຕິຜູ້ເຂົ້າຊົມ
ພິທີເປີດນໍາໃຊ້ ໂຮງງານຜະລິດນໍ້າປະປາແສນດິນ ຢ່າງເປັນທາງການກຳລັງການຜະລິດໄລຍະທີ 01ຈຳນວນ 24,000 ແມັດກ້ອນ

02/06/2018

ໂຮງງານ​ນ້ຳ​ປະປາ​ແສນ​ດິນ ໄດ້​ເປິດ​ນຳ​ໃຊ້​ຢ່າງ​ເປັນ​ທາງ​ການ ເຊິ່ງ​ຄວາມ​ສາມາດ​ໃນ​ການ​ຜະລິດ​ໃນ​ໄລຍະ​ທີ 1 ແມ່ນ 24.000 ແມັດ​ກ້ອນ​ຕໍ່​ວັນ ໂດຍ​ຈະ​ສະໜອງ​ນ້ຳ​ສະອາດ​ໃຫ້​ປະຊາຊົນ​ບ້ານ​ໃກ້​ຄຽງ​ໄດ້ທັງ​ໝົດ 64 ບ້ານ ໂຄງການ​ດັ່ງກ່າວ​ເປັນ​ການ​ລົງທຶນ​ໃນ​ຮູບ​ແບບ BOT ໂດຍ​ແມ່ນບໍລິສັດ ເອ​ເຊຍລົງທຶນ​ພັດທະນາ ໃນ​ມູນ​ຄ່າ​ການ​ກໍ່​​ສ້າງ 15 ລ້ານ​ໂດ​ລາ​ສະຫະລັດ ຫຼື ປະມານ 120 ຕື້​ກີບ.

ທ່ານ ຄຳ​ເຜີຍ ວົງສາ​ຄຳ​ຜຸຍ ຜູ້ອຳນວຍການ​ໃຫຍ່ ລັດ​ວະສາ​ຫະ​ກິດນ້ຳ​ປະປາ​ນະຄອນຫຼວງ​ວຽງ​ຈັນ ກ່າວ​ໃນ​ພິທີ​ເປີດ​ນຳ​ໃຊ້​ໂຮງງານ​ດັ່ງກ່າວ​ວ່າ: ໂຮງງານ​ແຫ່ງ​ນີ້ ເປັນ​ໂຄງການ​ກໍ່ສ້າງ​ຜະລິດ​ນ້ຳ​ປະປາທີ່​ສະອາດ ຖືກຕ້ອງ​ຕາມ​ມາດຕະຖານ​ການ​ຜະລິດ​ນ້ຳ​ປະປາ ແລະ ຂາຍ​ໃຫ້​ລັດ​ວິ​ສາ​ຫະ​ກິດ​ນ້ຳ​ປະປາ​ນະຄອນຫຼວງ​ວຽງ​ຈັນ​ ເພື່ອ​ເຮັດ​ໃຫ້ການ​ບໍລິການ​ນ້ຳ​ປະປາ​ໃນ​ນະຄອນຫຼວງ​ວຽງ​ຈັນ​ພຽງພໍ ໂດຍ​ສະເພາະແມ່ນ​ປະຊາຊົນ​ທີ່​ອາໄສ​ຢູ່​ເຂດ​ໃກ້​ຄຽງ​ໂຮງງານ​ແຫ່ງ​ນີ້ ເຊິ່ງ​ປະກອບ​ມີ 56 ບ້ານຂອງ​ເມືອງ​ນາ​ຊາຍ​ທອງ ແລະ ສີ​ໂຄດ​ຕະບອງ ແລະ 8 ບ້ານ​ຂອງ​ເມືອງ​ໄຊ​ທານີ ທີ່​ມີ​ປະຊາກອນ​ຫຼາຍ​ກວ່າ 81.000 ຄົນ ແລະ ໃນ​ປີ 2020 ຈະ​ມີ​ປະຊາກອນ​ເພີ່ມ​ຂຶ້ນ​ຫຼາຍ​ກວ່າ 137.000 ຄົນ ສ່ວນ​ລະບົບ​ການ​ສົ່ງ​ນ້ຳ ແມ່ນ​ຈະ​ເຊື່ອມ​ຕໍ່​ລະບົບ​ທໍ່​ນ້ຳ​ປະປາທີ່​ມີ​ຢູ່​ແລ້ວ ໃຫ້​ມີ​ນ້ຳ​ພຽງພໍ​ໃນ​ການ​ບໍລິການ.

ທ່ານ ພຶດສະພາ ພົມ​ມະ​ສັກ ຜູ້ອຳນວຍການ​ບໍລິສັດ ເອ​ເຊຍລົງທຶນ​ພັດທະນາ ກ່າວ​ວ່າ: ໂຄງການ​ດັ່ງກ່າວ​ແມ່ນ​ມີ​ຄວາມ​ສຳຄັນ ​ໃນ​ການ​ສະໜອງ​ນ້ຳ​ສະອາດ​ໃຫ້​ກັບ​ປະຊາຊົນ​ນະຄອນຫຼວງ​ວຽງ​ຈັນ ເຊິ່ງ​ໂຄງການ​ໄລຍະ​ທີ 1 ທີ່​ມີ​ການ​ລົງທຶນ​ເຖິງ 15 ລ້ານ​ໂດ​ລາ​ສະຫະລັດ ແລະ ຍັງ​ມີ​ແຜນທີ່​ຈະ​ຂະຫຍາຍ​ກຳລັງ​ການ​ຜະລິດ ເຊິ່ງ​ເປັນ​ໂຄງການ​ໄລຍະ​ທີ 2 ໂດຍ​ຈະ​ສາມາດ​ຜະລິດ​ໄດ້ 48.000 ແມັດ​ກ້ອນ​ຕໍ່​ວັນ ສຳລັບ​ໂຮງງານ​ແຫ່ງ​ນີ້​ແມ່ນ​ໄດ້​ນຳ​ໃຊ້​ເຕັກ​ໂນ​ໂລ​ຊີ​ທີ່​ທັນ​ສະໄໝ ຄື​ລະບົບ​ສະກາ​ດາ​ເຂົ້າ​ໃນ​ການ​ຕິດຕາມ​ກວດກາ ນອກ​ນັ້ນ ກໍ່​ຍັງ​ໄດ້​ນຳ​ໃຊ້​ກົນ​ຈັກ​ແທນ​ແຮງ​ງານ​ຄົນ​ເຂົ້າ​ໃນ​ການ​ບຳລຸງ​ຮັກສາ.

 

ໃນ​ໂອກາດ​ດັ່ງກ່າວ ທ່ານ ສິນ​ລະ​ວົງ ຄຸດ​ໄພທູນ ເຈົ້າ​ຄອງ​ນະຄອນຫຼວງ​ວຽງ​ຈັນ ໄດ້​ສະແດງ​ຄວາມ​ຊົມເຊີຍ​ຕໍ່​ການ​ເອົາໃຈໃສ່​ຈັດ​ຕັ້ງ​ປະຕິບັດ​ໂຄງການ​ ຈົນ​ໄດ້​ຮັບ​ຜົນສຳເລັດ​ກ່ອນ​ກຳນົດ​ເວລາ ເປັນ​ໂຄງການ​ທີ່​ສ້າງ​ຜົນ​ປະໂຫຍດ​ໃຫ້​ກັບ​ປະຊາຊົນ ເມືອງ ແລະ ນະຄອນຫຼວງ​ວຽງ​ຈັນ ແຕ່​ກໍ່​ຕ້ອງ​ໄດ້​ເອົາໃຈໃສ່​ຕື່ມ​ບາງ​ດ້ານ​ຄື: ເຮັດ​ໃຫ້​ປະຊາຊົນ​ມີ​ນ້ຳ​ສະອາດ​ໃຊ້​ໃນ​ລາຄາ​ທີ່​ເໝາະ​ສົມ ເຮັດ​ໃຫ້​ຜູ້​ລົງທຶນ​ສາມາດ​ດຳເນີນ​ທຸລະ​ກິດ​ໄປ​ໄດ້​ຢ່າງ​ມີ​ປະ​ສິດທິ​ຜົນ ມອບ​ທັນ​ທະ​ໃຫ້​ລັດຖະບານ​ຢ່າງ​ເປັນ​ປົກກະຕິ ພ້ອມ​ທັງ​ສ້າງ​ຜົນ​ກຳໄລ​ໃຫ້​ກັບ​ນັກ​ລົງທຶນ ແລະ ອື່ນໆ ກ່ອນ​ຈະ​ເຮັດ​ໄດ້​ຄື​ແນວ​ນັ້ນ ຕ້ອງ​ໄດ້​ມີ​ການ​ປຶກສາ​ຫາລື ກຳນົດ​ລາຄາ​ນ້ຳ​ປະປາ​ຢ່າງ​ເປັນ​ເອກະ​ພາບ ເພື່ອ​ຜົນ​ປະໂຫຍດ​ທັງ​ຜູ້​ຊົມໃຊ້ ແລະ ຜູ້​ລົງທຶນ ເຮັດ​ໃຫ້​ທຸລະ​ກິດ​ດັ່ງກ່າວ​ເຂັ້ມແຂງ ປະກອບສ່ວນ​ເຂົ້າ​ໃນ​ການ​ພັດທະນາ​ເສດຖະກິດ-ສັງຄົມ​ຂອງ​ຊາດ ກໍ່​ຄືຂອງ​ນະຄອນ​ຫຼວງ​ວຽງ​ຈັນ.

ພິທີ​ເປີດ​ໂຮງງານ​ຜະລິດ​ນ້ຳ​ປະປາ​ແສນ​ດິນ ໄດ້​ຈັດ​ຂຶ້ນ​ໃນ​ວັນ​ທີ 2 ມິຖຸນາ 2018 ທີ່​ໂຮງງານ​ດັ່ງກ່າວ ບ້ານ​ແສນ​ດິນ ເມືອງ​ນາ​ຊາຍ​ທອງ ນະຄອນຫຼວງ​ວຽງ​ຈັນ ເຂົ້າ​ຮ່ວມ​ໃນ​ພິທີ​ຄັ້ງ​ນີ້​ຍັງ​ມີທ່ານ ສິນ​ລະ​ວົງ ຄຸດ​ໄພທູນ ເຈົ້າ​ຄອງ​ນະຄອນຫຼວງ​ວຽງ​ຈັນ ທ່ານນາງ ວິໄລ​ຄຳ ໂພ​ສາ​ລາດ ຮອງ​ລັດຖະມົນຕີ​ກະຊວງ​ໂຍທາ​ທິ​ການ-ຂົນສົ່ງ ທ່ານ ແກ້ວ​ພິລາ​ວັນ ອາ​ໄພ​ລາດ ຮອງ​ເຈົ້າ​ຄອງ ພ້ອມ​ດ້ວຍ​ພາກສ່ວນ​ກ່ຽວຂ້ອງ

ກັບຄືນ